(18/05/2011)
.
ਫੀਤੀ ,
ਰੋਟੀਆਂ ਦੀ ਮੌਜ ਲੱਗ ਗਈ;
ਸਾਡੇ ਜੇਠ ਨੇ ਸਾਧਣੀ ਕੀਤੀ |
ਮੇਵੇ,
ਬੋਤਾ ਲਿਆਵੀਂ ਉਹ ਮਿੱਤਰਾ ;
ਜਿਹੜਾ ਡੰਡੀਆਂ ਹਿੱਲਣ ਨਾ ਦੇਵੇ |
ਅੜਕੇ,
ਬੋਤਾ ਹੌਲੀ ਤੋਰ ਮਿੱਤਰਾ;
ਮੇਰਾ ਨਰਮ ਕਾਲਜਾ ਧੜਕੇ |
ਦਾਣੇ,
ਕਾਲਜੇ ਨੂੰ ਬੈਠ ਫੜਕੇ;
ਬੋਤਾ ਹੌਲੀ ਨਾ ਤੁਰਨ ਮੇਰਾ ਜਾਣੇ|
ਕੇਲੇ,
ਮੁੰਡਾ ਤੇਰਾ ਮੈਂ ਚੁੱਕ ਲਊਂ;
ਚੱਲ ਚੱਲੀਏ ਜਰਗ ਦੇ ਮੇਲੇ |
ਆਉਣਾ ,
ਨਾਵਾਂ ਨਾ ਤੁੜਾਵੀਂ ਰਾਂਝਣਾ;
ਅਸਾਂ ਤੇਰੀ ਵੇ ਖੱਟੀ ਦਾ ਬੰਦ ਪਾਉਣਾ |
ਪੱਖੀਆਂ ,
ਮਾਪਿਆਂ ਨੇ ਰੱਖੀ ਲਾਡਲੀ ;
ਸਹੁਰੇ ਘਰ ਵੇ ਪਿਹਾਈਆਂ ਚੱਕੀਆਂ |
(15/05/2011)
ਪਾਵੇ
ਬੋਲੀਆਂ ਦੇ ਪੁਲ ਬੰਨ੍ਹਦੀ ;
ਮੈਨੂੰ ਹਾਏ ਨਚਣਾ ਨਾ ਆਵੇ |
ਪਾਵੇ,
ਗੱਡੀ ਵਿਚੋਂ ਲੱਤ ਲਮਕੇ ,
ਕੋਈ ਕੂੰਜ ਚੱਲੀ ਮੁਕਲਾਵੇ |
ਪਾਵੇ,
ਉੱਡਦੀ ਧੂੜ ਦਿਸੇ ;
ਬੋਤਾ ਮਾਹੀ ਦਾ ਨਜਰ ਨਾ ਆਵੇ |
ਪਾਵੇ,
ਸਹੁਰਿਆਂ ਦਾ ਪਿੰਡ ਆ ਗਿਆ ;
ਮੈਨੂੰ ਘੁੰਡ ਕਢਣਾ ਨਾ ਆਵੇ |
ਮਣਕੇ,
ਮਾਪਿਆਂ ਨੇ ਨਹੀਓਂ ਤੋਰਨੀ ;
ਕਾਹਨੂੰ ਆ ਗਿਐਂ ਸਰ੍ਹੋਂ ਦਾ ਫੁੱਲ ਬਣਕੇ |
ਅੜੀਏ,
ਪਾਣੀਆਂ ਨੂੰ ਅੱਗ ਲੱਗ ਜੂ ,
ਘੁੰਡ ਕਢ ਲੈ ਪੱਤਨ ਤੇ ਖੜੀਏ |
ਥਾਲੀ,
ਭਾਵੇਂ ਤੇਰੀ ਮਹਿੰ ਵਿਕ ਜੇ ;
ਜੁੱਤੀ ਲੈਣੀ ਐਂ ਤਾਰਿਆਂ ਵਾਲੀ |
ਗਹਿਣਾ,
ਜੇ ਰੱਖਣਾ ਤਾਂ ਤੇਰੀ ਮਰਜ਼ੀ ,
ਅਸਾਂ ਕਿਸੇ ਦਾ ਰੋਹਬ ਨਾ ਸਹਿਣਾ |
ਢ਼ੇਰੇ,
ਦਾਤੀ ਨੂੰ ਲਵਾ ਦੇ ਘੁੰਗਰੂ;
ਵਾਢੀ ਕਰੂੰਗੀ ਬਰੋਬਰ ਤੇਰੇ |
ਢੇਰ ,
ਝਾਂਜਰਾਂ ਘੜਾ ਦੇ ਹਾਣੀਆਂ ;
ਅੱਡੀ ਮਾਰ ਕੇ ਲੰਘੂੰਗੀ ਘਰ ਤੇਰਾ |
ਮੱਖਣਾ ,
ਸਹੁਰੀਂ ਜਾ ਕੇ ਦੋ ਦੋ ਪਿੱਟਣੇ;
ਘੁੰਡ ਕਢਣਾ ,ਤਵੀਤ ਨੰਗਾ ਰੱਖਣਾ |
ਤਾਰੇ,
ਜੋਗੀਆਂ ਨੂੰ ਬੀਨ ਭੁੱਲ ਗਈ ;
ਮੇਰੀ ਗੁੱਤ ਨੇ ਫਰਾਟੇ ਮਾਰੇ |